நீயே என் ரைட் சாய்ஸ் அன்பே-1

வாரநாட்களின் பரபரப்பு இல்லாமல் அமைதியான சனிக்கிழமை காலை 9.00 மணிக்கு உத்ரா குறுக்கும் நெடுக்குமாக கூடத்தில் யோசனையோடு நடந்து கொண்டிருந்தாள். இதைப்பார்த்த அவள் அண்ணன் மஹேஷ்,"என்ன உத்ரா வீக்கெண்டு இவ்ளோ சீக்கிரமா உனக்கு விடிஞ்சிருச்சு என்ன எங்கேயாவது ஊர் சுத்த போறியா?"என்று அவளை சீண்டினான்.

தலையை சிலுப்பி அவனைப்பார்த்து முறைத்துவிட்டு, "தோ பாருடா நானே டென்ஷனா இருக்கேன் என்னோட வாயை பிடுங்காதே எதாவது சொல்லிடபோறேன்!"

"அட இங்க பாருடா இவ சொல்ற வரைக்கும் என்ன நாங்க சும்மா இருப்போமா. ஏதோ பாவம் இன்னிக்கி உன்ன அம்மா ஹவுஸ் அரெஸ்ட் பண்ணிட்டாளே..நீயும் வேற குட்டிப்போட்ட பூனையாட்டம் சுத்திண்டு இருக்கியேன்னு கேட்டா எனக்கு இன்னும் தேவை தான்"

இவர்களின் சம்பாஷனையைக்கேட்டுக்கொண்டே வந்த கமலாப்பாட்டி, "ஏன்டா கண்ணா அவளை வம்பிழுக்கறே? இன்னிக்கி அந்த பையன் வீட்லேர்ந்து வந்து பாத்திட்டு போனாங்கன்னா குழந்தைக்கு சீக்கிரமா கல்யாணம் ஆயிடும்.அப்பறம் நீ இப்படியெல்லாம் அவளைப்பேச முடியாது"

"என்ன பாட்டி நீங்க அதுக்குள்ளே கல்யாணம் வரைக்கும் போயிட்டீங்க..நானே என்ன பேசறதுன்னு பயங்கற குழப்பத்துல இருக்கேன்"

"அடடே என்னோட தங்கை பேச கூட யோசிப்பாளா!!"

"குழந்தே சும்மா இரேண்டா! நீ சொல்லுடி தங்கம் உனக்கு என்ன கவலை"

"பாட்டி நீயே சொல்லு அந்த ஆன்டி என்ன கோவில்ல பார்த்தாளாம்.அப்பறம் ஒரு கல்யாணத்துல பார்த்துட்டு அப்பா கிட்ட பேசி இதோ இன்னிக்கி பொண்ணு பாக்கறவரைக்கும் வந்திருக்கு..அம்மாவும் அப்பாவும் நீங்கள்ளாம் கூட என்னோட கருத்த கேக்ககாம ஒத்துக்கிட்டீங்க..எப்படி பாட்டி நான் ஒன்னுமே தெரியாத பையன கல்யாணம் பண்ணிகிட்டு,லைஃப் முழுக்க ஷேர் பண்ணுவேன்? கேக்கவே சகிக்கலை"

"என்ன உத்ரா யாரயாவது லவ் பண்றியா?? அதச்சொல்ல பயந்துகிட்டு இப்படியெல்லாம் மழுப்பறியா?நான் உனக்கு ஹெல்ப் பண்றேன்..Dont Worry My Dear Sis"

"அட என்னோட ரேஞ்சுக்கு யாருமே கிடைக்கலைடா"என்று கூறி அவனுக்கு பழிப்புக்காட்டினாள்.

பரிவுடன் அவள் கூந்தலை வருடிக்கொண்டே"உத்ரா உன்னோட கவலை எனக்கு நல்லாவே புரியுதுடா கண்ணா.பாரு அரேஞ்சுடு மேரேஜ்னா இதெல்லாம் சகஜம் தானே.சரி உனக்கு நான் சொல்றது பிடிச்சிருந்ததுன்னாக்க அப்படியே பேசு சரியா?"

மகிழ்ச்சியுடன் பாட்டியிடம் வந்த உத்ரா,"Come On பாட்டி சொல்லுங்க".ஏதோ மொக்கை மேட்ச் பார்க்க் உட்காந்த மஹேஷ் ஆஃப் பண்ணிவிட்டு வந்தமர்ந்தான்.

"சரி அந்த பையன் பேரு என்ன?"

"கோதம் பாட்டி" கிரீச்சிட்டான் மஹேஷ்.

"கோதமும் இல்ல ஹிக்கிம் போதமும் இல்ல அவன் பேரு கவுதம்"

"இதோ பாரு உத்ரா முதல்ல நீ அந்த பையன "அவன் இவன் வாடா போடா"ன்னு சொல்லாதே.என்ன தான் பசங்களுக்கு பொண்ணுங்க செல்லமா அப்படி கூப்பிடறது பிடிக்கும்னாலும் முதலேயே அப்படி கூப்பிடாதே.வாங்க சொல்லுங்கன்னு சீன் போடு,அவனா கொஞ்ச நேரத்துல நீ என்னை வா போன்னு சொல்லலாம் எதுக்கு இந்த பார்மாலிட்டீஸ் எல்லாம்னு சொல்வான் அதை அப்புறம் கெட்டியா பிடிச்சிக்கோ"என்று கண் சிமிட்டினாள்.

"அட அட என்னமா கவுக்கறீங்கப்பா ஒரு பையன"

"பாருடாமா அப்புறம் அவங்க இன்னிக்கி உன்ன பொண்ணு பாக்க வராங்கன்னாலும் எல்லாமே விசாரிச்சிருப்பாங்க..இது ஒரு சம்பிரதாயத்துக்குத்தான்.அவங்க வீட்லயும்,பையனுக்கும் உன்ன பிடிச்சிடுச்சாம்.நீ எப்பவுமே இருக்கறாப்போல இயல்பா இரு.உனக்கு ஏதாவது பையன்கிட்டக்கேக்கனும்னாலும் பேசு"

"அது தான் பாட்டி பெரிய பிரச்சனையே என்னன்னு பேசுவேன்.நான் முன்ன பின்ன பாத்தது கூட இல்லியே..அன்னிக்கி அவரோட கஸின் கல்யாணம் அதுக்குக்கூட இல்லாம ஆபீஸ் போயிட்டார் சின்ஸியர் சிகாமணி"

சிரித்துவிட்டு "முதல்ல பேசச்சொல்லும்போது கொஞ்சம் தயக்கமாத்தான் இருக்கும் ஆனா பேசினாத்தானே ஆகும்"

"ஏன்டி என்கிட்ட இவ்ளோ வாயடிக்கறே அவர் கிட்ட பேசமாட்டியோ?"

"ஹிம்ம் இதத்தான் சொல்ல வந்தேன். நீ முதல்ல எதுவும் பேசாதே.அந்த பையன பேசவிடு..நல்லா அப்சர்வ் பண்ணு எப்படி பேசறான்,எதைப்பத்தில்லாம் பேசறான்,தற்பெருமை அடிக்கறானா.ஒருத்தர் பேசும் விதம் வார்த்தைய வெச்சுக்கிட்டே நீ கம்பர்டபிளா பீல் பண்றியான்னு தெரிஞ்சுக்கலாம்"

"என்ன பேசினா எப்படின்னு புரிஞ்சுப்பேன்?"

"அவங்க அம்மா அப்பா குடும்பம் பத்தி சொன்னா,அவங்கத்தான் எனக்கு முக்கியம்..நீ அவங்கள அட்ஜஸ்ட் பண்ணிக்கனும் அப்படினின்னுப்பேசினா கேட்டுக்கோ.அப்படி பேசும் பசங்க உன் மேலேயும் பின்னாடி அக்கறையா இருப்பாங்க.

நீயும் உங்க அம்மா அப்பா குடும்பத்தப்பத்தி சுருக்கமா சொல்லிடு.அடுத்து உன்னோட வேலைப்பத்திக்கேட்டா, பாரதி கண்ட புதுமைப்பெண் நான் தான் அப்படின்னு ஒரேடியா பேசாம, எனக்கு கேரியர் முக்கியம் தான். அதுக்காக குடும்பத்துக்கும் முக்கியத்துவம் தருவேன் அப்படின்னு பொறுமையா சொல்லு.ஒரு அந்நியன் கிட்ட பேசும்பொது நீ எப்படி பேசுவியோ அப்படி பேசனும் ஆனா முக்கியமான விஷயத்தையும் சொல்லிடனும்"

"மொத்ததுல இவ வால சுருட்டி வெச்சுக்க சொல்றீங்க!"

மஹேஷை முறைத்திவிட்டு "ஏன் பாட்டி ஒரு 10 நிமிஷத்துல எப்படி முடிவு பண்றதாம்?"

"அதான்டிப்பொண்ணே சொல்றேன்..இன்னிக்கி கொஞ்சமாத்தான் தெரியும் உனக்கு..எப்படியும் மத்த விஷயமெல்லாம் பேசி இந்த இடம் முடிவாச்சுன்னா கொஞ்சம் கொஞ்சமா தெரியும்.நானே உனக்கு எப்படி அணுகறதுன்னு சொல்றேன்"

பாட்டியை இறுக்கி அணைத்து கன்னத்தில் முத்தமிட்டு "சோ சுவீட் பாட்டி நீங்க!"

"பாட்டி பாவம்டி விடு உன்னோட வெயிட் அவங்க தாங்க மாட்டாங்க" மஹேஷ் இப்படி அவளை வம்பிழுத்துக்கொண்டிருக்கும் போதே வாசலில் மணிஅடிக்க திறந்தவன் அப்படியே அசந்து நின்றுவிட்டான்.

(தொடரும்)